Saneg Qashqadaryodagi uchta konda gaz qazib olish hajmini oshirdi
Kompaniya "Chuvama", "Qizilrabot" va "Sho‘rtepa" konlarida taqsimlangan gaz siqish texnologiyasini qo‘llash orqali gaz qazib olish hajmini oshirishga muvaffaq bo‘ldi.
Gazni siqish "Chuvama" gaz hisobini yuritish stansiyasida joylashgan modulli kompressor qurilmasi (MKQ) yordamida amalga oshiriladi. Ayni paytda qurilma umumiy gaz qazib olish hajmini ikki barobarga – kuniga 104 ming kubometrdan 200 ming kub metrgacha oshirish va keyin uni Muborak gazni qayta ishlash zavodiga yetkazib berish imkonini berdi.
MKQning ishlash prinsipi kompressorga ulangan gaz quduqlarining og‘izlarida vakuum hosil qilishdan iborat. Bu quduq ustki bosimi past bo‘lgan gaz quduqlarining alohida majmuasida qazib chiqarish hajmini ko‘paytirish imkonini beradi.
MKQ gazni mexanik aralashmalardan tozalash tizimidan, siqish liniyasi hamda neft ta’minoti tizimidan iborat. Uning afzalligi - uskunani boshqarishning mobilligi, ixchamligi va avtonomligida mujassam.
“Qashqadaryo hududidagi asosiy konlarning qatlam energiyasi tabiiy gaz zahiralarini qazib chiqarish tufayli tugab qolganligi sababli, Saneg gaz olishni oshirish usullarini faol ravishda joriy qilmoqda. MKQ ulardan biridir. Ularning yordami bilan biz rentabel qazib olinayotgan zaxiralar hajmini ko‘paytirish va 30 yildan ortiq ishlagan quduqlar unumdorligini oshirish imkoniyatiga ega bo‘lamiz”, — deydi Saneg ijrochi direktori To‘lqin Yusupov.
MKQni joriy etish loyihasi GRDC ilmiy-texnologik markazi bilan hamkorlikda ishlab chiqilgan va Enter Engineering pudratchi kompaniyasi bilan birgalikda amalga oshirilmoqda.
Loyiha doirasida hozirda Saneg "Muborak" bo‘limining "Shimoliy Maymanak" va "Rasulquduq" konlari quduqlaridan kuniga 450 ming kub metrdan ortiq tabiiy gazni siqish imkonini beruvchi "Shimoliy Maymanak" MKQni o‘rnatishga tayyorgarlik ishlari olib borilmoqda.